‘బాహుబలి’ మొదలెట్టి మూడేళ్లు

తెలుగు చిత్ర పరిశ్రమని అంతర్జాతీయ స్థాయికి తీసుకెళ్లిన సినిమా బాహుబలి. గతేడాది జులై 10 న విడుదలైన ఈ మూవీ ప్రపంచ వ్యాప్తంగా విజయ డంఖా మోగిస్తోంది. ఇప్పటికీ ఈ చిత్రం కలక్షన్ల వర్షం కురిపిస్తోంది. దర్శకధీరుడు ఎస్.ఎస్.రాజమౌళి ఆలోచనకు రూపం ఈ కళాఖండం. ఇది వెండితెరపై ఆవిష్కరించడానికి ఎంతోమంది కృషి చేశారు. ‘బాహుబలి” ది బిగినింగ్ కోసం మూడేళ్ల క్రితం(జులై 6- 2013) ఇదే రోజు తొలి క్లాప్ కొట్టారు.

అప్పటి నుంచి ప్రత్యక్షంగా, పరోక్షంగా ఈ సినిమా కోసం  చిత్ర బృందం పనిచేస్తోంది. ఈ సందర్భాన్ని పురస్కరించుకుని జక్కన్న టీమ్ అందరికీ ధన్యవాదాలు తెలిపింది. ” ‘ఈ ప్రయాణంలో ఎన్నో సవాళ్లు .. మరెన్నో విజయాలు .. మాతో పాటు ప్రయాణించిన అందరికీ కృతజ్ఞతలు” అని సోషల్ మీడియాలో టీమ్ సభ్యులు పోస్ట్ చేశారు.  ‘బాహుబలి’ చిత్ర నిర్మాణం మొదలైన రోజు ఎంత ఉత్సాహంగా ఉన్నామో .. ఇప్పటికీ అదే ఉత్సాహంతో ఉన్నామని వెల్లడించారు. ఈ సినిమా మొదలు పెట్టినప్పుడు బాహుబలి ఒక పార్టు గానే అనుకున్నారు. కానీ కథ డిమాండ్ చేయడంతో రెండు భాగాలు చేశారు. ఇప్పుడు బాహుబలి కంక్లూజన్ కోసం యుద్ధ సన్నివేశాలను చిత్రీకరిస్తున్నారు. దీనిని వచ్చే వేసవికి  విడుదల చేయాలని భావిస్తున్నారు