Allu Aravind: ఆ రీమేక్ విషయంలో అల్లు అరవింద్ నిర్ణయమిదేనా..?

July 1, 2022 / 03:55 PM IST

మలయాళంలో రిలీజైన ‘నాయట్టు’ సినిమా అక్కడ సూపర్ హిట్ అయింది. నెట్ ఫ్లిక్స్ లో ఈ సినిమా అందుబాటులో ఉండడంతో చాలా మంది సినీ ప్రియులు ఈ సినిమాను చూసి థ్రిల్ అయ్యారు. ముగ్గురు పోలీసుల చుట్టూ తిరిగే కథ ఇది. మైనారిటీ కమ్యూనిటీ, పాలిటిక్స్ కారణంగా ముగ్గురు పోలీసులు ఒక సమస్యలో ఇరుక్కుంటారు. దాని నుంచి బయటపడే ఛాన్స్ లేక పారిపోతారు. ఆ తరువాత ఏం జరిగిందనేదే ఈ సినిమా.

ఈ సినిమాకి వచ్చిన క్రేజ్ చూసిన నిర్మాత అల్లు అరవింద్ తెలుగులో రీమేక్ చేయాలనుకున్నారు. వెంటనే తెలుగు రీమేక్ రైట్స్ ను కొనేశారు. గతేడాది రావు రమేష్, ప్రియదర్శి, అంజలి ప్రధాన పాత్రల్లో ఈ సినిమాను లాంచ్ చేశారు. ‘పలాస’ సినిమా ఫేమ్ కరుణ కుమార్ ను డైరెక్టర్ గా అనౌన్స్ చేశారు. పూజా కార్యక్రమాలు పూర్తి చేసుకున్న ఈ సినిమా షూటింగ్ మాత్రం జరుపుకోలేదు. దీంతో ఈ సినిమా ఆగిపోయిందంటూ రూమర్లు మొదలయ్యాయి.

ఈ విషయంపై గీతాఆర్ట్స్ సంస్థ కానీ అల్లు అరవింద్ కానీ స్పందించలేదు. ఇదిలా ఉండగా.. తాజాగా అల్లు అరవింద్ ఓ సినిమాను మొదలుపెట్టారు. శ్రీకాంత్, రాహుల్ విజయ్, శివానీ రాజశేఖర్ లీడ్ రోల్స్ లో ఈ సినిమాను తెరకెక్కించనున్నారు. తేజ మార్ని దర్శకుడు. అయితే ఈ సినిమా వివరాలను మాత్రం బయటపెట్టలేదు. అందుతున్న సమాచారం ప్రకారం.. ఇది ‘నాయట్టు’ రీమేక్ అని టాక్. త్వరలోనే ఈ విషయాన్ని అనౌన్స్ చేస్తారట.

ఇది ‘నాయట్టు’ రీమేక్ అయితే ముందు మొదలుపెట్టిన సినిమా సంగతేంటి అనే ప్రశ్నలు తలెత్తుతున్నాయి. మొత్తం క్యాస్టింగ్ ను, డైరెక్టర్ ను అల్లు అరవింద్ మార్చాల్సిన పరిస్థితి ఎందుకు వచ్చిందని ఆరా తీస్తున్నారు. ముందుగా కరుణ కుమార్ ఈ రీమేక్ నుంచి తప్పుకున్నారట. ఆ తరువాత మిగిలిన వాళ్లు కూడా ఏవో కారణాలు చెప్పి తప్పుకున్నారని అంటున్నారు. అయితే అల్లు అరవింద్ కి రషెస్ నచ్చక మొత్తం టీమ్ ను రీప్లేస్ చేశారని మరో టాక్ నడుస్తుంది.