దంగల్ రికార్డును బద్దలు కొట్టిన బాహుబలి కంక్లూజన్

దర్శకధీరుడు ఎస్.ఎస్.రాజమౌళి తెరకెక్కించిన వెండితెర కళాఖండం బాహుబలి కంక్లూజన్ గత ఏడాది ఏప్రిల్ 28 న రిలీజ్ అయి 1700 కోట్లు వసూలు చేసి ఔరా అనిపించింది. జపాన్ భాషలోనూ గత ఏడాది డిసెంబర్ లో రిలీజ్ అయి వందరోజులు పూర్తి చేసుకొని అరుదైన రికార్డును సొంతం చేసుకుంది. యంగ్ రెబల్ స్టార్ ప్రభాస్ డ్యూయల్ రోల్ చేసిన ఈ చిత్రం నిన్న (మే 4 ) చైనా లో 7000 స్క్రీన్లలో రిలీజ్ అయి రికార్డు సృష్టించింది. అలాగే 2.5 లక్షల డాలర్ల ప్రీ రిలీజ్ చేసి ఆశ్చర్యపరిచింది. ఇప్పుడు ఓపెనింగ్స్ లు రికార్డులను బద్దలు కొట్టింది. తొలిరోజే సుమారు 2.85 మిలియన్ డాలర్లును కొల్లగొట్టి టాప్ ఓపెనింగ్స్ అందుకున్న ఇండియన్ సినిమాల జాబితాలో 3వ స్థానంలో నిలిచింది. ఇది బాలీవుడ్ మిస్టర్ పెర్ఫెక్ట్ అమీర్ ఖాన్ సినిమా ‘దంగల్’ ఓపెనింగ్స్ కన్నా ఎక్కువ.

‘దంగల్’ చైనాలో మొదటి రోజు 2.4 మిలియన్ డాలర్లను వసూలు చేసింది. మొదటి రోజే దంగల్ రికార్డును బీట్ చేసిన బాహుబలి 2 లాంగ్ రన్ లో దంగల్ పేరిట ఉన్న మొదట స్థానాన్ని కైవశం చేసుకుంటుందని ట్రేడ్ వర్గాల వారు తెలిపారు. సులువుగా 300 కోట్లు రాబడుతుందని అంచనా వేస్తున్నారు. దీంతో 2000 కోట్ల మైలురాయిని క్రాస్ చేస్తుందని భావిస్తున్నారు. ప్రభాస్ తో పాటు రానా, అనుష్క, సత్యరాజ్, రమ్యకృష్ణ తదితరుల నటన, అద్భుతమైన గ్రాఫిక్స్, విజువల్ ఎఫెక్ట్స్ చైనా వాసులను మెస్మరైజ్ చేస్తోందని అక్కడి మీడియా అభినందనల వర్షం కురిపిస్తోంది.