నందమూరి బాలకృష్ణ ప్రస్తుతం ఎన్టీఆర్ బయోపిక్ షూటింగ్ బిజీలో ఉన్నాడు. ఈ సినిమా రెండు భాగాలుగా రానున్న విషయం తెలిసిందే. బాలయ్య తన సొంత బ్యానర్ లో ఈ సినిమాని నిర్మిస్తున్నాడు. స్వర్గీయ నందమూరి తారకరామారావు గారి పాత్రలో బాలకృష్ణ నటిస్తుండటం, నిజ జీవితం ఆధారంగా సినిమా వస్తుండటంతో ఈ సినిమా పైన ప్రేక్షకుల్లో భారీ అంచనాలే ఉన్నాయి. ఇక ఈ సినిమా పూర్తైన వెంటనే బాలకృష్ణ వి.వి.వినాయక్ డైరెక్షన్ లో నటిస్తాడని సమాచారం. అయితే ఈ సినిమా తరువాత బాలకృష్ణ వేరే బ్యానర్ లో సినిమాలు చేయడం మానేస్తాడంటూ వార్తలు వినిపిస్తున్నాయి.
ఎన్టీఆర్ బయోపిక్ ఎన్.బి.కె. ఫిలిమ్స్ బ్యానర్ లో వస్తున్న విషయం తెలిసిందే. ఈ సినిమా తరువాత వినాయక్ డైరెక్షన్ లో చేసే సినిమాకి సి.కళ్యాణ్ నిర్మాణంలో ఉంటుంది. ఈ సినిమాకి కూడా ఎన్.బి.కె. ఫిలిమ్స్ కి భాగస్వామ్యం ఉంటుందని అంటున్నారు. ఇక బాలకృష్ణ వారసుడు మోక్షజ్ఞ సినీ ఎంట్రీ ఇవ్వబోతున్నాడనే వార్తలు చాలా రోజులుగా వినిపిస్తున్నాయి. అయితే మోక్షజ్ఞ ఎంట్రీ ఇచ్చే లోపు తన సొంత నిర్మాణ సంస్థ అయిన ఎన్.బి.కె. ఫిలిమ్స్ ని బాగా ఎస్టాబ్లిష్ చేయాలనీ భావిస్తున్నాడని తెలుస్తుంది. ఒకవేళ ఇదేకనుక నిజమైతే బాలయ్య వేరే బ్యానర్ లో చేయబోయే ఆఖరి సినిమా ఇదే అవుతుందని భావిస్తున్నారు.
