సునీల్ మెగాస్టార్ చిరంజీవికి వీరాభిమాని. చిరు డ్యాన్స్ లు చూసి సినిమాలపై ప్రేమ పెంచుకున్నట్లు పలు మార్లు చెప్పాడు. నటుడిగా అడుగు పెట్టిన తర్వాత చిరుతో కలిసి అనేక చిత్రాల్లో నటించాడు. అప్పటి నుంచి ఇప్పటివరకు మెగాస్టార్ పై సునీల్ కి అభిమానం తగ్గలేదు. మొన్నమా టీవీ సినీ అవార్డు ఫంక్షన్లో కూడా గ్యాంగ్ లీడర్ వెనుకాల పూల రంగడు స్టెప్పులేశాడు. వీరిద్దరి మధ్య మంచి అనుబంధముంది.
సునీల్ హీరోగా నటించిన తాజా చిత్రం జక్కన్న ఆడియో విడుదల వేడుక జూన్ 24 న జరగనుంది. ఈ కార్యక్రమానికి మెగాస్టార్ ని సునీల్ ఆహ్వానించగా అందుకు ఆయన సరే అన్నట్లు తెలిసింది. రేపు జరిగే వేడుకకు చిరు ముఖ్య అతిథిగా హాజరుకానున్నట్లు సమాచారం. ఆయనతో పాటు దర్శకుడు వి.వి.వినాయక్ కూడా రానున్నట్లు టాక్. కత్తిలాంటోడు సినిమా షూటింగ్ మొదలైన తర్వాత చిరు పాల్గొనే మొదటి కార్యక్రమం ఇదే కావడం విశేషం.
ఆర్. సుదర్శన్ రెడ్డి నిర్మాణంలో దర్శకుడు వంశీ కృష్ణ అకెళ్ళ తెరకెక్కించిన జక్కన్నకు దినేష్ సంగీతాన్ని అందించారు. ఇందులోని టైటిల్ సాంగ్ ని గురువారం రెడ్ ఎఫ్ ఎం లో హీరో సునీల్ ఆవిష్కరించారు. మిగిలిన ఆల్బమ్ ని శుక్రవారం ముఖ్య అతిథులు విడుదల చేయనున్నారు. ఈ సినిమా వచ్ఛే నెలలో విడుదల కానుంది.
