Chiranjeevi Marriage: చిరంజీవి పెళ్లి వెనుక చిరు చెప్పని విషయాలు అల్లు అరవింద్‌

October 13, 2022 / 03:06 PM IST

అల్లు రామలింగయ్య శతజయంతి వేడుకల్లో చిరంజీవి తన వ్యక్తిగత జీవితం గురించి చాలా విషయాలు చెప్పుకొచ్చాడు. ముఖ్యంగా సురేఖతో తన పెళ్లి ఎలా జరిగింది అనే విషయాల గురించి మాట్లాడాడు. దీంతో కుటుంబ విషయాన్ని చిరంజీవి ఇలా బయటకు అందరి ముందు చెప్పేశారు ఏంటి? అంటూ కొంతమంది విసుక్కున్నా, ఇంకొంతమంది మాత్రం అల్లు రామలింగయ్య గురించి చెప్పే ఉద్దేశంలో భాగంగానే అలా అన్నారు అని అనుకుంటున్నారు. అయితే చిరు పెళ్లి విషయంలో మరో ఆసక్తికర విషయం బయటికొచ్చింది.

చిరంజీవి ఇంటి అల్లుడిగా చేసుకుందామని తొలుత అనుకున్నది అల్లు రామలింగయ్య కాదట. ఇంకా చెప్పాలంటే అసలు ఆయనకు సురేఖను ఇవ్వడానికి తొలుత ఆయన ఒప్పుకోలేదట. అల్లు రామలింగయ్య భార్య కనకరత్నం ఆలోచన అట. దీని గురించి ఇటీవల ఓ ఇంటర్వ్యూలో అల్లు అరవింద్‌ చెప్పుకొచ్చారు. చిరంజీవిని అల్లుడిని చేసుకోవాలన్న ఆలోచన మొదట అమ్మకు వచ్చింది అని చెప్పిన అల్లు అరవింద్‌ అదెలా జరిగిందో కూడా చెప్పారు.

‘‘మా ఇంటి పైన సత్యనారాయణ అనే ఒకాయన ఉండేవాడు. ఒకసారి ఆయన్ని కలవడానికి చిరంజీవి మా ఇంటికి వచ్చాడు. తిరిగి ఆయన వెళ్లిపోయాక సత్యనారాయణను చిరంజీవి గురించి మా అమ్మ కొన్ని వివరాలు అడిగింది. చిరంజీవి గురించి మొత్తం వివరాలు కన్నుక్కొంది. రాత్రి నాన్న ఇంటికొచ్చాక మొత్తం విషయాలు చెప్పింది. మొదట్లో నాన్న ఈ విషయాన్ని తేలిగ్గా తీసుకున్నారు. సినిమా వాళ్లకు మన అమ్మాయిని ఇవ్వడం ఇష్టం లేదు అన్నట్లుగా మారారట.

ఆ తర్వాత ‘మన ఊరి పాండవులు’ సినిమా షూటింగ్‌ సమయంలో చిరంజీవితో కలసి నాన్న 20 రోజులు పని చేశారు. అప్పుడు చిరంజీవి గురించి అన్ని విషయాలు తెలుసుకుని.. చిరంజీవి ఓ మంచివాడు అని నిర్ధరణకు వచ్చారు. ఆ తర్వాత డీవీఎస్‌ రాజుని అడిగి పెళ్లి విషయంలో నిర్ణయం తీసుకున్నారు. చిరంజీవి చెప్పింది ‘మన ఊరి పాండవులు’ సినిమా నుండి చెప్పుకొచ్చారు. అంతకుముందు ఏమైందో ఇప్పుడు తెలిసింది.