“కత్తిలాంటోడు” పై కస్సుమంటున్నారు !!

వి.వి.వినాయక్ దర్శకత్వంలో చిరంజీవి నటించే 150వ చిత్రానికి “కత్తిలాంటోడు” అనే టైటిల్ ని పరిశీలిస్తున్న విషయం తెలిసిందే. అయితే.. ఈ టైటిల్ పై మెగా ఫాన్స్ పెద్ద ఎత్తున పెదవి విరుస్తున్నారని తెలుస్తోంది. 149 సినిమాల్లో నటించి, దాదాపు రెండు దశాబ్దాలు “మెగా స్టార్”గా వెలుగొంది, “కేంద్ర మంత్రి”గానూ పని చేసిన చిరంజీవిని ఇప్పుడు కొత్తగా “కత్తిలాంటోడు” అనడం అత్యంత హాస్యాస్పదమని వారిలో పలువురు వ్యాఖ్యానిస్తున్నారనే సమాచారం అందుతోంది.
కెరీర్ బిగినింగ్ లో ఉన్న కుర్రాళ్ళకు సూటయ్యే “కత్తిలాంటోడు” అనే టైటిల్ ను చిరంజీవి సినిమాకు పెట్టడమేంటని ఈ సందర్భంగా వారు ప్రశ్నిస్తున్నారు. “కత్తి” అనే తమిళ సినిమాకు రీమేక్ రూపం కాబట్టి “కత్తిలాంటోడు” అనే టైటిల్ ను ఎంపిక చేసుకోవడాన్ని వీరు తప్పు పడుతున్నారు. “కత్తిలాంటోడు” అనే టైటిల్ పెట్టడమంటే అది చిరంజీవి స్థాయిని కచ్చితంగా తగ్గించడమేనని వారు వాపోతున్నారు.
ఈ నేపధ్యంలో “కత్తిలాంటోడు” అనే టైటిల్ ని పక్కన పెట్టి.. మరో కత్తి లాంటి టైటిల్ కోసం అన్వేషించడం వినాయక్ బృందానికి అనివార్యం కానుంది!!