Dil Raju, Acharya: దిల్ రాజు వదులుకుంటే సినిమా ఫ్లాపా?

May 3, 2022 / 08:16 AM IST

టాలీవుడ్ ఇండస్ట్రీలో స్టార్ ప్రొడ్యూసర్ గా నిర్మాత దిల్ రాజుకు పేరుంది. పరిమిత బడ్జెట్ లో అన్ని వర్గాల ప్రేక్షకులకు నచ్చే సినిమాలను నిర్మించడంతో పాటు క్రేజ్ ఉన్న సినిమాలకు డిస్ట్రిబ్యూటర్ గా వ్యవహరిస్తూ దిల్ రాజు క్రేజ్ ను పెంచుకుంటున్నారు. ఈ ఏడాది ఆర్ఆర్ఆర్, కేజీఎఫ్2 సినిమాలతో దిల్ రాజుకు కళ్లు చెదిరే లాభాలు దక్కాయి. ఈ రెండు సినిమాల ద్వారా దిల్ రాజుకు ఏకంగా 50 కోట్ల రూపాయల లాభాలు వచ్చాయని సమాచారం.

వాస్తవానికి ఆచార్య సినిమా నైజాం హక్కులను దిల్ రాజు తీసుకోవాల్సి ఉంది. ఇందుకు సంబంధించి ఆయన అడ్వాన్స్ కూడా చెల్లించారు. అయితే వరంగల్ శ్రీను ఎక్కువ మొత్తం ఆఫర్ చేయడంతో ఆచార్య నైజాం హక్కులు వరంగల్ శ్రీను చేతికి వెళ్లాయి. అయితే దిల్ రాజు ఇలా తీసుకోవాలని భావించి వెనక్కు తగ్గిన సినిమాలు బాక్సాఫీస్ వద్ద డిజాస్టర్లుగా నిలిచాయని ఇండస్ట్రీ వర్గాల్లో వినిపిస్తోంది.

చాలా సంవత్సరాల క్రితం దిల్ రాజు చిరంజీవి హీరోగా గుణశేఖర్ డైరెక్షన్ లో తెరకెక్కిన మృగరాజు సినిమా హక్కులను కొనుగోలు చేయాలని భావించారు. అయితే ఎక్కువ రేటు చెప్పడం, ఇతర కారణాల వల్ల ఆయన వెనక్కు తగ్గారు. ఇప్పుడు ఆచార్య విషయంలో కూడా అదే రిపీట్ అయింది. నిర్మాత దిల్ రాజుకు ఊహించని విధంగా అదృష్టం కలిసొస్తుందని నెటిజన్ల నుంచి కామెంట్లు వ్యక్తమవుతున్నాయి.

దిల్ రాజు నిర్మాతగా తెరకెక్కిన ఎఫ్3, థాంక్యూ, చరణ్ శంకర్ కాంబో మూవీ కొన్ని నెలల గ్యాప్ లోనే రిలీజ్ కానున్నాయి. చరణ్ శంకర్ కాంబో మూవీకి సర్కారోడు అనే టైటిల్ ను పరిశీలిస్తున్నారని సమాచారం అందుతోంది. దిల్ రాజు ఈ సినిమాలతో కూడా విజయాలను అందుకుంటారేమో చూడాల్సి ఉంది. సినిమాల ఫలితాల విషయంలో దిల్ రాజు జడ్జిమెంట్ ఎక్కువసార్లు నిజం కావడం గమనార్హం.