కంచె సినిమాతో జాతీయ అవార్డు అందుకున్నదర్శకుడు క్రిష్ జాగర్లమూడికి పెళ్లి ఘడియలు మొదలయ్యాయి. హైదరాబాద్ కి చెందిన వైద్యురాలు రమ్య వెలగ ను జీవిత భాగస్వామిగా చేసుకునే సమయం ఆసన్నమైంది. వీరిద్దరూ కుటుంబ సభ్యుల సమక్షంలో శనివారం ఉంగరాలు మార్చుకున్నారు.
నగరంలోని ఓ ప్రైవేట్ ఫంక్షన్ హాల్ లో క్రిష్, రమ్యల నిశ్చితార్థ వేడుక వైభవంగా జరిగింది. ఈ కార్యక్రమానికి ఇరు కుటుంబాల బంధువుల తో పాటు, క్రిష్ కి సినీ పరిశ్రమలోని స్నేహితులు హాజరయ్యారు. ప్రస్తుతం తాను దర్శకత్వం వహిస్తున్న “గౌతమి పుత్ర శాతకర్ణి” చిత్ర హీరో బాలకృష్ణ, సతీమణి వసుంధర తో కలిసి వచ్చి పెళ్లి పీటలు ఎక్కనున్న వధూవరులను ఆశీర్వదించారు. క్రిష్, రమ్యల పెళ్లి ఆగస్టులో జరుగుతుందని, తేదీని త్వరలోనే వెల్లడిస్తామని క్రిష్ కుటుంబ సభ్యులు చెప్పారు.
