సూపర్ స్టార్ రజనీకాంత్ తో చంద్రముఖి అనే సినిమాని తెరకెక్కించిన డైరక్టర్ పి. వాసు ఇక లేరు అనే వార్త నిన్నటి నుంచి కోలీవుడ్ చిత్ర పరిశ్రమలో హాట్ టాపిక్ అయింది. ఈ డైరక్టర్ తమిళంలోనేకాకుండా తెలుగు, మలయాళం, కన్నడం, హిందీ భాషల్లో అనేక హిట్ చిత్రాలను రూపొందించారు. దీంతో వాసు కి ఏమైందని సినీ ప్రముఖులు కంగారుతో ఆరా తీయడం మొదలెట్టారు. ఈ విషయం స్వయంగా వాసుకి తెలియడంతో.. అయన ఈ వార్తను ఖండించారు. ఓ వీడియో మెసేజ్ ద్వారా తాను ఆరోగ్యంగానే ఉన్నట్టు స్పష్టం చేశారు. “నేను చాలా ఆరోగ్యంగా ఉన్నాను. నాకు వచ్చిన వాట్సాప్ మెసేజ్ చూడ‌గానే వెంటనే న‌వ్వొచ్చింది. నా అభిమానులు ఎవరూ కూడా ఈ వార్తలపై ఆందోళన చెంద‌వ‌ద్దు.
ఈ రోజు ఆరు కిలోమీటర్ల వరకు నడిచాను. పూర్తిగా ఆరోగ్యంతో ఉన్నాను. నా ఆరోగ్యంపై ఆందోళన చెందిన వారందరికీ ధన్యవాదాలు.” అంటూ వీడియోలో చెప్పారు. అంతేకాదు ఈ ఏడాదిలో మూడు సినిమాల‌కు తాను ద‌ర్శ‌క‌త్వం వ‌హించ‌బోతున్న‌ట్లు వాసు వెల్లడించారు. స్టార్స్ విషయంలో ఇటువంటి నకిలీ వార్తలు గతంలోనూ వ్యాపించిన దాఖలాలు ఉన్నాయి. అందువల్ల సోషల్ మీడియాలో వచ్చిన వార్తలన్నింటినీ నమ్మి ఆందోళన పడాల్సిన అవసరం లేదని అభిమానులు గుర్తించుకోవాలి.
