తమ సినిమాపై వస్తున్న వార్తలపై స్పందించిన తేజ టీమ్!

దగ్గుబాటి రానాకి హిట్ ఇవ్వడంతో దగ్గుబాటి కుటుంబంలో స్టార్ హీరోతో మరో సినిమా చేసే అవకాశం దక్కించుకున్నారు తేజ. నేనే రాజు నేనే మంత్రి మూవీ తర్వాత తేజ విక్టరీ వెంకటేష్ తో సినిమా చేయబోతున్నారు. అనిల్ సుంకర, సురేష్ బాబు సంయుక్తంగా నిర్మిస్తున్న ఈ చిత్రం ప్రీ ప్రొడక్షన్ పనులు వేగంగా సాగుతున్నాయి. అంతకంటే ఎక్కువగా ఈ చిత్రంపై రూమర్స్ వస్తున్నాయి. ఈ సినిమాలో వెంకీ సరసన మెహ్రీన్ ఖరారు చేసినట్లు ప్రచారం జరుగుతోంది. తాజాగా ఈ చిత్రానికి “ఈ నగరానికి ఏమైంది” అనే టైటిల్ రిజిస్టర్ చేయించినట్లు పుకార్లు షికార్లు చేస్తున్నాయి.

అయితే ఈ వార్తలను చిత్ర బృందం ఖండించింది. సినిమాలో నటించే ఆర్టిస్టులు, టెక్నీషియన్ల ఎంపిక చర్చల దశలో ఉందని స్పష్టం చేసింది. అంతా ఫైనల్ అయినా తర్వాత అధికారికంగా ప్రకటిస్తామని స్పష్టం చేసింది. అబ్బాయికి సూపర్ హిట్ ఇచ్చిన తేజ బాబాయ్ కి ఎటువంటి హిట్ ఇస్తారో చూడాలి.