శుక్రవారం అన్నాక సినిమాలు రిలీజవ్వడం, కొన్ని హిట్ అవ్వడం, ఇంకొన్ని ఫ్లాప్ అవ్వడం ఖాయం. అయితే.. నిన్నటి శుక్రవారం మాత్రం తెలుగు చిత్రసీమకు చాలా కీలకమైనది. ఎందుకంటే.. రాజశేఖర్ సినిమా చాలా ఏళ్ల తర్వాత తన సినిమాతో పాజిటివ్ బజ్ క్రియేట్ చేశాడు. ప్రవీణ్ సత్తారు దర్శకత్వంలో రూపొందిన “గరుడ వేగ”తోపాటు మరో రెండు సినిమాలి “ఏంజల్, నెక్స్ట్ నువ్వే” సినిమాలు కూడా రిలీజయ్యాయి. హెబ్బా పటేల్ ప్రధాన పాత్రలో రూపొందిన “ఏంజల్” ఫ్లాపవ్వగా.. “నెక్స్ట్ నువ్వే” యావరేజ్ చిత్రంగా మిగిలిపోయింది. దాంతో.. యాక్షన్, డ్రామా పుష్కలంగా ఉన్న “గరుడ వేగ” ఈ వీక్ విన్నర్ గా నిలిచింది.
రాజశేఖర్ సెటిల్డ్ పెర్ఫార్మెన్స్, శ్రీచరణ్ పాకాల సంగీతం, అంజి సినిమాటోగ్రఫీ, ప్రవీణ్ సత్తారు టేకింగ్ ప్రత్యేక ఆకర్షణలుగా నిలవగా.. ఎలాంటి అతి లేకుండా చాలా రియలిస్టిక్ గా సాగిన కథాంశం, యాక్షన్ సీక్వెన్స్ లు సినిమాకి హైలైట్స్ అని చెప్పుకోవచ్చు. “ఎవడైతే నాకేంటి” తర్వాత రాజశేఖర్ కి దొరికిన సూపర్ హిట్ కావడంతో ఇండస్ట్రీ వర్గాలు మాత్రమే కాక రాజశేఖర్ అభిమానులు కూడా ఆనందపరవశంలో మునిగితేలుతున్నారు. ఇకపోతే.. “గరుడ వేగ” కలెక్షన్స్ పరంగానూ వాయివేగంతో దూసుకుపోతోంది.
