పబ్లిక్ స్టార్ శ్రీకాంత్ హీరోగా కరణం బాబ్జీ దర్శకత్వంలో వచ్చిన తాజా చిత్రం ‘ఆపరేషన్ 2019’. ఇది శ్రీకాంత్ కు 125 వ చిత్రం కావడం విశేషం. డిసెంబర్ 1 న విడుదలైన ఈ చిత్రానికి ‘పరవాలేదు .. ఒకసారి చూడొచ్చు’ అనే టాక్ వచ్చినప్పటికీ, రజినీ- శంకర్ ల ‘2.0’ చిత్రం హవా కొనసాగుతున్న తరుణంలో ‘ఆపరేషన్ 2019’ ను ఎవ్వరూ పెద్దగా పట్టించుకోవట్లేదు. అయితే ఇటీవలి కాలంలో తాను నటించిన చిత్రాల్లో మంచి సంతృప్తిని ఇచ్చిన చిత్రం ‘ఆపరేషన్ 2019’ అని, కానీ, ఈ చిత్రం పై వచ్చిన రివ్యూలను చూసి బాధపడ్డానని హీరో శ్రీకాంత్ అంటున్నారు.
తాజాగా ఏర్పాటు చేసిన ఈ చిత్రం సక్సెస్ మీట్లో హీరో శ్రీకాంత్ మాట్లాడుతూ… ‘అభిమానులు చిత్రాన్ని ఆదరిస్తున్నారు, కలెక్షన్లు కూడా బాగున్నాయి. నిర్మాత, డిస్ట్రిబ్యూటర్లు ఎంతో ఆనందంగా ఉన్నారు. విమర్శకుల అభిప్రాయాలను నేనెప్పుడూ గౌరవిస్తాను.. అయితే రివ్యూలు రాసేవాళ్లు కూడా కాస్త ఆలోచించి రాస్తే చాలా మంచిది. ఒక సినిమా బాగా ఆడితే, పరిశ్రమలో మరో పది మందికి ఉపాధి లభిస్తుంది’ అంటూ శ్రీకాంత్ చెప్పుకొచ్చారు.
