బాహుబలి చిత్రాల తర్వాత తెలుగు చిత్ర పరిశ్రమలో ఆసక్తి రేకేత్తిస్తున్న మూవీ సాహో. ఇది సెట్స్ మీద ఉంది. అయితే ఇంకా టైటిల్ కూడా ఖరారుకాకముందే మరో మూవీ గురించి తెలుసుకోవాలని తెలుగుసినీ అభిమానులు ఆరాటపడుతున్నారు. అదే రాజమౌళి మ్యాసివ్ మల్టీ స్టారర్ మూవీ. రామ్ చరణ్, రామారావులు తొలిసారి కలిసి నటించనున్న ఈమూవీ ప్రీ ప్రొడక్షన్ వర్క్ పక్కాగా జరుగుతోంది. డీవీవీ ఎంటర్టైన్మెంట్స్ పతాకంపై భారీ బడ్జెట్ తో దానయ్య నిర్మించనున్న ఈ ప్రాజక్ట్ కి సంబంధించిన వివరాలను అధికారికంగా వెల్లడించకముందే అనేక సంగతులు ఫిలిం నగర్లో చక్కర్లు కొడుతున్నాయి.
1980 ఒలింపిక్స్ నేపథ్యంలో కథ సాగుతుందని మొన్నటివరకు ప్రచారం సాగింది. అందులో వాస్తవం లేదని చిత్ర బృందం చెప్పడంతో కథ విషయంలో సస్పెన్స్ కొనసాగుతోంది. తాజాగా హీరోల క్యారెక్టర్స్ బయటికి వచ్చాయి. ఈ సినిమాలో రామ్ చరణ్ పోలీస్ ఆఫీసర్ పాత్రలో కనిపిస్తారని, ఆయన సోదరుడిగా ఎన్టీఆర్ గ్యాంగ్ స్టర్ పాత్రలో నటిస్తారని తెలిసింది. అంతేగాక వీరి మధ్య వచ్చే సన్నివేశాలు అద్భుతంగా ఉంటాయని సమాచారం. మూడు వందల కోట్ల బడ్జెట్ తో తెరకెక్కుతోన్న ఈ సినిమాలో హీరోయిన్లుగా రాశీఖన్నా, రకుల్ ప్రీత్ సింగ్, కీర్తి సురేష్ పేర్లు వినిపిస్తున్నాయి.
