ఒక సినిమాకి క్రేజ్ పెంచడంలో, ప్రీరిలీజ్ బజ్ క్రియేట్ చేయడంలో సినిమా టీజర్ & ట్రైలర్ అనేవి కీలకపాత్ర పోషిస్తాయి. సదరు టీజర్ & ట్రైలర్ చూసిన తర్వాతే ప్రేక్షకులు కూడా సినిమాని థియేటర్లో చూడాలా లేదా అనేది డిసైడ్ అవుతుంటారు. అయితే.. అన్నీసార్లు ఆ ట్రైలర్ ను చూసినప్పుడు కలిగిన అనుభూతిని సినిమా పంచకపోవచ్చు. ఆ విధంగా ట్రైలర్ తో భీభత్సమైన హైప్ క్రియేట్ చేసి సినిమాతో దారుణంగా నిరాశపరిచిన సినిమా “కబాలి”. ఆ చేదు అనుభవాన్ని ప్రేక్షకులు ఇంకా మర్చిపోలేదు అందుకే.. “కబాలి” అనంతరం మళ్ళీ అదే కాంబినేషన్ లో వస్తున్న “కాలా”ను పెద్దగా పట్టించుకోవడం లేదు.
రజనీకాంత్ తోపాటు నట శిఖరం నానా పటేకర్ మరో ముఖ్యపాత్రలో నటిస్తున్న ఈ చిత్రం ట్రైలర్ నిన్న విడుదలైంది. సినిమా ట్రైలర్ లో రజనీ అభిమానుల్ని ఆకట్టుకొనే అంశాలన్నీ పుష్కలంగా ఉన్నాయి.. కానీ ఎందులో “కబాలి” ఫ్లేవర్ మాత్రం గట్టిగా కనపడింది. ఆల్మోస్ట్ సేమ్ టు సేమ్ థీమ్ తో రూపొందుతున్న సినిమా కావడంతో “కాలా” సినిమా ట్రైలర్ అంచనాలను అందుకోగలిగింది కానీ.. సరికొత్త ఆశలు మాత్రం రేపలేకపోయింది. మరి జూన్ 7న విడుదలవుతున్న ఈ చిత్రం ప్రేక్షకుల్ని ఏమేరకు ఆకట్టుకుంటుందో చూడాలి.
