సాధారణంగా టాలీవుడ్ హీరోయిన్స్ క్రేజ్ మహా ఉంటే నాలుగైదు సంవత్సరాలు మాత్రమే ఉంటుంది అనే భావన ఎప్పుడూ ఉంది. అయితే కాజల్ మాత్రం ఇందుకు భిన్నంగా ఉంది. 2007 లో ‘లక్ష్మీ కళ్యాణం’ చిత్రంతో టాలీవుడ్ కు పరిచయమైన కాజల్.. ఇప్పటికీ టాలీవుడ్ లో అగ్రతారగా కనిపిస్తుండడం విశేషం. ఒక హీరోయిన్ దాదాపు 11 సంవత్సరాలు కొనసాగుతుందంటే… కచ్చితంగా నటనకి ప్రాధాన్యత ఉండే పత్రాలు చేస్తేనే ఆ అవకాశం ఉంటుంది. కానీ కాజల్ మాత్రం ఇప్పటికీ స్టార్ హీరోలు, సీనియర్ హీరోలు, యువ హీరోలు అందరి సరసన హీరోయిన్ గా నటించే అవకాశాలు దక్కించుకుంటుంది. టాలీవుడ్ టాప్ హీరోయిన్స్ అయిన నయనతార .. అనుష్క .. నటనకి ప్రాధాన్యత గల విభిన్నమైన పాత్రలను ఎంచుకుంటూ కొనసాగుతుంటే…. కాజల్ మాత్రం ఇంకా గ్లామర్ కి ప్రాధాన్యం ఉండే పాత్రలనే ఎంచుకుంటూ రావడం విశేషం.
అయితే తాజాగా కాజల్ ఒక విభిన్నమైన పాత్రలో కనిపించబోతున్నట్టు తాజా సమాచారం. బెల్లంకొండ సాయి శ్రీనివాస్ హీరోగా తేజ డైరెక్షన్లో చేస్తున్న చిత్రంలో నెగెటివ్ షేడ్స్ ఉన్న పాత్ర పోషిస్తుందంట. ఈ చిత్రానికి ‘సీత’ అనే టైటిల్ ను ఖరారు చేయబోతున్నట్టు సమాచారం. కాజల్ కు బెల్లంకొండ శ్రీనివాస్ తో ఇది రెండవ సినిమా. గతంలో వీరిద్దరి కాంబినేషన్లో ‘కవచం’ వచ్చిన సంగతి తెలిసిందే. ప్రస్తుతం ‘సీత’ షూటింగు దశలో వుంది. ఈ చిత్రంలో డబ్బు పిచ్చి వున్న అమ్మాయిగా .. నెగెటివ్ షేడ్స్ కలిగిన పాత్రలో కాజల్ కనిపించనుందని టాక్ వినిపిస్తోంది. ఇక కాజల్ కూడా నటనకు ప్రాధాన్యత కలిగిన సినిమాలను చేయాలనీ నిర్ణయించుకుంటుందేమో చూడాలి.
