‘అమిగోస్‌’ సినిమాతో శుక్రవారం ప్రేక్షకుల ముందుకు రావడానికి సిద్ధమవుతున్నాడు కల్యాణ్‌రామ్‌. తొలిసారి మూడు పాత్రలు పోషిస్తున్న ఆ సినిమా పెద్ద నమ్మకమే పెట్టుకున్నాడు. తమ్ముడు ఎన్టీఆర్‌ ‘జై లవ కుశ’ సినిమాతో ఇలానే ట్రిపుల్‌ రోల్‌తో వచ్చి అదరగొట్టాడు. దీంతో కల్యాణ్‌ రామ్‌ కూడా అదే తరహా ఫలితాన్ని ఆశిస్తున్నాడు. అయితే ఆ సినిమా వచ్చినప్పుడు సంగతి చూద్దాం. ఇది కాకుండా కల్యాణ్‌రామ్‌ చేతిలో ఉన్న మరో రెండు సినిమాల సంగతేంటి అని అభిమానులు చూస్తున్నారు.
వరుసగా కమర్షియల్‌ సినిమాలు చేస్తూ వచ్చిన కల్యాణ్‌ రామ్‌.. మధ్య మధ్యలో ప్రయోగాలు చేసినా.. ఫలితాలు సరిగ్గా రాకపోవడంతో ఆపేశాడు. అయితే ఇటీవల కాలంలో మళ్లీ స్పీడ్‌ పెంచాడు. కమర్షియల్‌ హంగులు ఉంటూనే, ప్రయోగాలకు ఓటేస్తున్నాడు. అలా చేసిన సినిమా ‘బింబిసార’ భారీ విజయాన్ని అందుకుంది. కరోనా కారణంగా ప్రేక్షకులు థియేటర్లకు వస్తారా? రారా? అనే డౌట్‌ ఉన్నప్పుడు ఆ సినిమా వచ్చి విజయం అందుకుని, నమ్మకాన్ని పెంచింది.
‘బింబిసార’ సినిమాకు రెండో పార్టు ఉంటుందని అప్పుడే చెప్పేశారు. దీంతో ఆ సినిమా ఎప్పుడు? అనే ప్రశ్న వినిపిస్తూనే ఉంది. మొన్నీ మధ్య ఆ సినిమా దర్శకుడు మల్లిడి వశిష్ట్‌ సినిమా పనులు ప్రారంభించారు అని ఓ ఫొటో కూడా బయటకు వచ్చింది. అయితే షూటింగ్‌ ఎప్పుడు అనే విషయాలు మాత్రం చెప్పలేదు. ఇప్పుడు కల్యాణ్‌ రామ్‌ ఆ విషయం చెప్పుకొచ్చాడు. ఈ సినిమా షూటింగ్‌ ఈ ఏడాది ఆఖరులో ప్రారంభమయ్యే అవకాశ ఉంది అని చెప్పాడు.
ఇక కల్యాణ్‌రామ్‌ చేస్తున్న మరో సినిమా ‘డెవిల్‌’. నవీన్‌ మేడారం దర్శకత్వంలో రూపొందుతున్న ఈ సినిమా షూటింగ్‌ అప్‌డేట్‌ను కూడా కల్యాణ్‌ రామ్‌ చెప్పాడు. ‘డెవిల్‌’ సినిమా 70 శాతం చిత్రీకరణ పూర్తయిందట. ప్రస్తుతం యాక్షన్‌ సన్నివేశాల చిత్రీకరణ జరుగుతోందట. మరో మూడు నెలల్లో సినిమా పూర్తవుతుందని చెప్పాడు. దీంతో మరో ఆరు నెలల్లో ‘డెవిల్‌’ను థియేటర్లలో చూడొచ్చు అని తెలుస్తోంది.
రైటర్‌ పద్మభూషణ్‌ సినిమా రివ్యూ & రేటింగ్!
రెబల్స్ ఆఫ్ తుపాకుల గూడెం సినిమా రివ్యూ & రేటింగ్!
మైఖేల్ సినిమా రివ్యూ & రేటింగ్!
టాలీవుడ్ లో రీమిక్స్ చేసిన 20 తెలుగు పాటలు ఇవే!
