రామ్ బైలింగ్యువల్ ప్రాజెక్టులో కృతి శెట్టి హీరోయినట..!

February 18, 2021 / 04:37 PM IST

మెగాస్టార్ చిరంజీవి అన్నట్టుగానే ‘ఉప్పెన’ హీరోయిన్ కృతి శెట్టి.. నిజంగానే స్టార్ హీరోయిన్ అయిపోయేలా ఉంది. ప్రస్తుతం ఆమె డిమాండ్ మామూలుగా లేదు. ఇప్పటికే నాని నటిస్తున్న ‘శ్యామ్ సింగ రాయ్’ చిత్రంలో ఛాన్స్ కొట్టేసింది. అంతేకాకుండా తమిళ్ లో కూడా ‘ఉప్పెన’ చిత్రం విడుదలయ్యి అక్కడ కూడా విజయవంతంగా ప్రదర్శింపబడుతోంది. విజయ్ సేతుపతికి ఉన్న స్టార్ ఇమేజ్ కారణంగా అక్కడ కూడా ‘ఉప్పెన’ ను విడుదల చేశారు. దాంతో అక్కడి హీరోలు కూడా కృతి శెట్టి పై కన్నేశారట.

ఇప్పటికే స్టార్ హీరో సూర్య సినిమాలో హీరోయిన్ ఆఫర్ ఈమెకు వచ్చిందట. కానీ ఇంకా ఆమె ఫైనల్ డెసిషన్ చెప్పలేదు. ఇదిలా ఉండగా.. ఇప్పుడు హీరో రామ్ ఏరికోరి ఈమెను తన తదుపరి సినిమాలో హీరోయిన్ గా తీసుకోవాలని దర్శకనిర్మాతలకు సూచించాడట. ‘రెడ్’ తరువాత రామ్ తన తరువాతి చిత్రాన్ని కోలీవుడ్ డైరెక్టర్ లింగుస్వామితో చెయ్యబోతున్నాడు.ద్విభాషా చిత్రంగా తెలుగుతో పాటు తమిళంలో కూడా ఈ చిత్రం రూపొందనుంది. ఈ నేపథ్యంలో హీరోయిన్ గా కృతి శెట్టిని ఎంపిక చేసుకోవాలని చిత్ర యూనిట్ సభ్యులు ఆమెను సంప్రదించడానికి రెడీ అయ్యారట.

తమిళంలో కూడా ఆమెకు క్రేజ్ పెరగడంతో రామ్ సినిమా యానిట్ సభ్యులు ఈ నిర్ణయం తీసుకున్నట్టు తెలుస్తుంది. ఆమె కనుక ఈ ప్రాజెక్టుని ఓకె చేస్తే.. ఆమె ఖాతాలో మరో క్రేజీ ప్రాజెక్టు చేరినట్టే అని చెప్పాలి.