Poorna: అది ఫేక్ ప్రొఫైల్.. మోసపోవద్దు.. హెచ్చరించిన పూర్ణ!

November 11, 2022 / 03:19 PM IST

ఈ మధ్యకాలంలో సైబర్ క్రైమ్స్ బాగా ఎక్కువయ్యాయి. మొబైల్ ఫోన్ ద్వారా ఎక్కువ సైబర్ మోసాలు జరుగుతున్నాయి. వాట్సాప్‌ను సైబర్ మోసగాళ్లు ఆయుధంలా వాడుకుంటున్నారు. జనాలకు డబ్బు ఆశ చూపించి వారి దగ్గర నుంచే ఆ డబ్బుని కొట్టేస్తున్నారు. ఈ సైబర్ మోసాలపై పోలీసులు ఎన్ని అవగాహనా కార్యక్రమాలు చేపడుతున్నా.. ఇలాంటి మోసాలు మాత్రం ఆగడం లేదు. తాజాగా నటి పూర్ణ అలియాస్ షమ్నా కాసిం భర్త పేరుతో వాట్సాప్‌ లో కొన్ని మెసేజ్ లు వస్తున్నాయి.

ఇవి కూడా ఆర్థిక లావాదేవీలకు సంబంధించిన మెసేజ్ లే. అయితే వీటిపై జాగ్రత్తగా ఉండాలని పూర్ణ హెచ్చరిస్తోంది. దుబాయ్ లో సెటిల్ అయిన వ్యాపారవేత్త, జేబీఎస్ గ్రూప్ కంపెనీ వ్యవస్థాపకుడు, సీఈవో షానిద్ ఆసిఫ్ అలీను నటి పూర్ణ గత నెలలో పెళ్లాడారు. దుబాయ్ లో వీరి వివాహం ఎంతో గ్రాండ్ గా జరిగింది. దీనికి సంబంధించిన ఫొటోలను పూర్ణ సోషల్ మీడియా ద్వారా అభిమానులతో పంచుకుంది. తన భర్త కంపెనీకి సంబంధించిన ఈవెంట్స్ ను కూడా ఇన్స్టాగ్రామ్ పేజ్ ద్వారా ప్రమోట్ చేస్తోంది.

అయితే తాజాగా పూర్ణ తన సోషల్ మీడియా అకౌంట్ లో ఓ పోస్ట్ పెట్టారు. అది తన భర్త పేరుతో జరుగుతున్న సైబర్ మోసానికి సంబంధించిన పోస్ట్. +971 52 724 5366 ఫోన్ నంబరు కలిగిన వాట్సాప్ అకౌంట్ ద్వారా తన భర్త షానిద్ పేరుతో ఎవరో మాట్లాడుతున్నారనే విషయం తన దృష్టికి వచ్చిందని.. అది తన భర్త కాదని చెప్పింది. ఈ విషయంలో చాలా జాగ్రత్తగా ఉండాలని పూర్ణ తన పోస్ట్ లో పేర్కొన్నారు.

ఈ ప్రొఫైల్ తో మీరు ఏవైనా లావాదేవీలు జరిపితే దాంతో తన భర్తకు ఎలాంటి సంబంధం లేదని.. అతడు బాధ్యుడు కాదని తెలిపింది. ప్రస్తుతం పూర్ణ.. టీవీ షో, సినిమాలతో కాలం గడుపుతుంది.