జీతూ జోసెఫ్‌ కథతో రీఎంట్రీ ఇస్తున్న బిగ్‌బాస్‌ స్టార్

July 24, 2021 / 03:22 PM IST

తెలుగు బిగ్‌బాస్‌ హౌస్‌ నుండి బయటికొచ్చాక అవకాశాల వరద ఉంటుందని చాలా మంది అనుకుంటారు. అయితే ఇప్పటివరకు అలా వచ్చినవారిలో వరుస అవకాశాలు సాధించింది పెద్దగా ఎవరూ లేరనే చెప్పాలి. తొలి బిగ్‌బాస్‌ నుండి పరిస్థితి ఇలానే ఉంది. బయటకు రాగానే అవకాశాలు వచ్చేస్తున్నాయ్‌ అంటూ చెబుతారు కానీ… ఏవీ పట్టాలెక్కవు. అలా వరుస అవకాశాలు వస్తున్నట్లు ప్రకటించినా… సినిమా పట్టాలెక్కించని వారిలో కౌశల్‌ కూడా ఉన్నాడు. అయితే తాజాగా ఆయన సినిమా ఒకటి అనౌన్స్‌ అయ్యింది.

‘దృశ్యం’తో దేశవ్యాప్తంగా ఇమేజ్‌ సంపాదించుకున్న జీతూ జోసెఫ్‌ కథతో ఓ సినిమా రూపొందనున్నట్లు కౌశల్‌ ప్రకటించాడు. శంకర్‌ అనే కొత్త దర్శకుడు దీనికి దర్శకత్వం వహిస్తారు. సినిమా పేరు చెప్పలేదుగా… ‘రైట్‌’. అవును సినిమా ‘రైట్‌’. దీని కాన్సెప్ట్‌ పోస్టర్ మీదనే సినిమా వివరాల్నీ రాసిచ్చారు. దాంతోపాటు పోస్టర్‌ టాప్‌లో పీపుల్‌ స్టార్‌ అని ట్యాగ్‌ కూడా రాసి ఉంది. ఇదెక్కడో విన్నట్లుగా ఉంది కదా. ఇంకెక్కడ మన నారాయణమూర్తి అన్న దగ్గర. ఆయనకు చాలా రోజుల క్రితమే పీపుల్స్‌ స్టార్‌ అనే బిరుదు ఇచ్చారు. ఆయన పీపుల్స్‌ అయితే… ఈయన పీపుల్‌ అన్నమాట.

‘‘The wait is over & happy to announce my dream project’’ అంటూ ఈ పోస్టర్‌ను షేర్‌ చేస్తూ రాసుకొచ్చారు కౌశల్‌ మండా. ‘‘గత మూడు సంవత్సరాలుగా నన్ను అభిమానిస్తూ నన్ను “పీపుల్ స్టార్” గా పిలుచుకుంటూ ఆనందిస్తూ, అన్నా నిన్ను బిగ్ స్క్రీన్ మీద హీరోగా చూడాలను వుంది. ఆ అవకాశం మాకు ఎప్పుడు వస్తుంది అంటూ ప్రతీ రోజు అడుగుతూ వారి కోరిక తీర్చటమే నా కలగా మార్చిన నా అభిమానులందరి కోసం ఈ రోజు మీ అందరి రోజు గా చేస్తూ నేను హీరో గా నటిస్తున్న “రైట్” మూవీ ముహూర్తం షాట్ మీతో పంచుకోవాలని అనుకుంటున్నా.ఎప్పటి లాగే మీ ప్రేమ , అభిమానం నా మీద, మా మూవీ యూనిట్ మొత్తం మీద చూపిస్తారని నాకు తెలుసు love you all ❤️ ’’ అంటూ తన అభిమానులు తన గురించి ఏమనుకుంటున్నారో కూడా చెప్పారు కౌశల్‌. ఆల్‌ ది బెస్ట్‌ కౌశల్‌ మండా చెబుదామా!