ఏప్రిల్ 26, 2001 రోజున థియేటర్ లో జనాలు అర్ధం కాని ఒక పాటకి తెగ ఊగిపోతున్నారు. ట్యూన్ క్యాచీగా ఉన్నా ఒక్క ముక్క కూడా అర్ధం కావడం లేదు. అసలు తెలుగు సినిమాలో హిందీ పాట ఏమిటో అని డిస్ట్రిబ్యూటర్లు, ఎగ్జిబిటర్లు కంగారుపడుతున్న తరుణంలో జనాలు సదరు పాటను విపరీతంగా ఎంజాయ్ చేస్తుండడంతో ఆ పాట ఒక సరికొత్త ట్రెండ్ కి పునాది వేసింది. ఆ పాట ఏమిటో ఈపాటికే మీకు ఐడియా వచ్చేసి ఉంటుంది. “ఖుషీ” సినిమాలోని “ఏ మేరా జహా”. పవన్ కళ్యాణ్ పవర్ ఫుల్ ఇంట్రడక్షన్ తర్వాత వచ్చే ఆ పాటకి ఇప్పటికీ జనాలు చిందులేస్తుంటారు.
అంతటి పవర్ ఫుల్ సాంగ్ ని కంపోజ్ చేసింది మణిశర్మ అనుకుంటూ వచ్చారు జనాలు నిన్నటివరకూ. అయితే.. నిన్న జరిగిన “చల్ మోహన్ రంగా” ప్రీరిలీజ్ ఈవెంట్ లో “ఏ మేరా జహా” పాటకి సంబంధించిన సూపర్ సీక్రెట్ ని రివీల్ చేశాడు పవన్ కళ్యాణ్. నిజానికి తెలుగు సినిమాలో హిందీ పాట పెట్టాలనే ఆలోచన పవన్ దేనట. అయితే.. మణిశర్మకు చెబితే ఆ బాధ్యతను మణిశర్మ తన ప్రియ శిష్యుడైన తమన్ కి అందించాడట. దాదాపు 17 ఏళ్ల తర్వాత ఈ విషయం బయటకి రావడంతో పవన్ అభిమానులందరూ షాక్ అయ్యారు.
