హిమజకు సర్ప్రైజ్ ఇచ్చిన పవన్ కళ్యాణ్..!

March 1, 2021 / 04:50 PM IST

‘కొంచెం ఇష్టం కొంచెం కష్టం’ అనే సీరియల్ ద్వారా ప్రేక్షకులకు పరిచయమైంది హిమజ. ఆ తరువాత ‘శివమ్’ ‘శతమానం భవతి’ ‘ధృవ’ ‘జనతా గ్యారేజ్’ ‘ఉన్నది ఒకటే జిందగీ’ ‘చిత్రలహరి’ ‘వినయ విధేయ రామ’ వంటి చిత్రాల్లో నటించింది. ‘బిగ్ బాస్ సీజన్3’ లో ఎంట్రీ ఇచ్చి తన క్రేజ్ ను మరింతగా పెంచుకుంది ఈ బ్యూటీ. ప్రస్తుతం.. మెగా స్టార్ చిరంజీవి ‘ఆచార్య’ చిత్రంలోనూ అలాగే పవన్ కళ్యాణ్- క్రిష్ కాంబినేషన్లో తెరకెక్కుతోన్న చిత్రంలోనూ అవకాశాలు దక్కించుకుంది హిమజ.

ఈ మధ్యనే పవన్ కళ్యాణ్ తో కలిసి ఓ సెల్ఫీ తీసుకుని దానిని తన సోషల్ మీడియాలో అప్లోడ్ చేసింది హిమజ. దానికే ఆమె తబ్బుబ్బిలైపోతుంటే.. తాజాగా ఆమెకు మరో సర్ప్రైజ్ ఇచ్చాడు పవన్ కళ్యాణ్. వివరాల్లోకి వెళితే.. హిమజకు పవన్ ఓ లేఖ రాసాడు. దీనిని తన ఇన్స్టాలో తన అభిమానులతో షేర్ చేసుకుంది హిమజ. ఇక ఆ లేఖలో పవన్ కళ్యాణ్.. ‘‘హిమజ గారికి, మీకు అన్ని శుభాలు జరగాలని, వృత్తిపరంగా మీరు ఉన్నత స్థాయికి వెళ్లాలని కోరుకుంటున్నాను’ అంటూ పేర్కొన్నాడు.

దీనికి హిమజ ‘నా ఆనందాన్ని మాటల్లోనూ,ఎమోజీల్లోనూ చెప్పలేకపోతున్నాను’ అంటూ హిమజ గాల్లో తేలిపోతుంది. ఇక పవన్ కళ్యాణ్- క్రిష్ ల చిత్రం టైటిల్ ను ఇంకా అనౌన్స్ చెయ్యలేదు కానీ. 2022 సంక్రాంతి కానుకగా ఈ చిత్రాన్ని విడుదల చెయ్యబోతున్నట్టు ప్రకటించారు. పవన్ తో ‘ఖుషి’ ‘బంగారం’ వంటి చిత్రాలను నిర్మించిన ఏ.ఎం.రత్నం ఈ చిత్రానికి నిర్మాత కావడం విశేషం.