ఆలశ్యం అవుతోంది కానీ.. విడుదలవ్వడం పక్కా – రాహుల్

ఒకపక్క విజయ్ దేవరకొండ తాజా చిత్రం “గీత గోవిందం” వంద కోట్ల గ్రాస్ కలెక్ట్ చేసి హల్ చేస్తూ.. బాబు క్రేజ్ ను విశేషంగా పెంచేస్తుంటే.. మరోపక్క విజయ్ దేవరకొండ మరో చిత్రం “ట్యాక్సీవాలా” మాత్రం విడుదల విషయంలో నానా ఇబ్బందులూ ఎదుర్కొంటోంది. సమస్య ఏమిటనేది ఇప్పటివరకు బయటకి తెలియకపోవడం, టీజర్ విడుదల చేసి రెండు నెలలు పూర్తికావస్తున్నా ఇప్పటివరకూ విడుదల తేదీ కూడా ప్రకటించకపోవడంతో ఈ సినిమాపై లెక్కలేనన్ని రూమర్లు పుట్టుకొచ్చాయి. సినిమాను థియేటర్లో కాక ఆన్ లైన్ లో రిలీజ్ చేయనున్నారని, నిర్మాతలకి అవుట్ పుట్ నచ్చలేదని, అందుకే రీషూట్స్ జరుగుతున్నాయని చాలా కథనాలు వెలువడ్డాయి.

అయితే.. ఈ కథనాలపై “ట్యాక్సీవాలా” డైరెక్టర్ రాహుల్ స్పందించాడు. నిన్న సాయంత్రం ఈ సినిమా గురించి అప్డేట్ చేస్తూ.. “సినిమా త్వరలోనే థియేటర్లో విడుదలవుతుంది. ఎలాంటి రీషూట్స్ జరగడం లేదు, రుమర్లను నమ్మకండి” అంటూ ట్వీట్ చేశాడు రాహుల్. దాంతో ఇప్పటివరకూ సినిమా విడుదల విషయంలో ఉన్న కన్ఫ్యూజన్ మొత్తం క్లియర్ అయ్యింది. అలాగే.. సినిమా రఫ్ వెర్షన్ లీక్ అయిన విషయాన్ని దృష్టిలో పెట్టుకొని దయచేసి పైరసీ ఎంకరేజ్ చేయకండి, క్లిప్పింగ్స్ ను షేర్ చేయకండి అంటూ కోరాడు రాహుల్.