నాని హీరోగా పరిచయం కాకముందు సహాయ దర్శకునిగా పనిచేసిన సంగతి తెలిసిందే. అప్పుడు నేర్చుకున్న సూత్రాలతోనే.. వరుసగా హిట్స్ సొంతం చేసుకుంటున్నారు. అంతేకాదు తనకు తెలిసిన విషయాలను తోటి నటీనటులకు కూడా చెప్పి.. అభినందనలు అందుకుంటున్నారు. ప్రస్తుతం నాని యువ దర్శకుడు మేర్లపాక గాంధీ దర్శకత్వంలో ‘కృష్ణార్జున యుద్ధం’ సినిమా చేస్తున్నారు. నాని ద్విపాత్రాభినయం చేస్తున్న ఈ చిత్రంలో అనుపమ పరమేశ్వరన్, రుక్సార్ మిర్ లు హీరోయిన్స్ గా నటిస్తున్నారు. ఆకతాయి సినిమాతో పరిచయమైన రుక్సార్ మరోసారి అదృష్టాన్ని పరీక్షించుకోబోతోంది.
ఈ సినిమా షూటింగ్ విశేషాలను రుక్సార్ మీడియాతో పంచుకుంది. “నాని తో కలిసి పనిచేయడం మరిచిపోలేని అనుభవం. షూటింగ్ లో నా పాత్రలో ఎప్పుడైనా కాస్త అతిగా నటించినట్టు అనిపిస్తే వెంటనే నన్ను అలెర్ట్ చేసేవాడు. సీన్ లో మనం అందంగా కనిపించాలంటే ఏం చేయాలి… అందుకు మన ప్రిపరేషన్ ఎలా ఉండాలనే దానిపై నాని చెప్పిన మంచి మాటలు నాకు ఎంతో ఉపయోగపడ్డాయి’’ అని నాని పై ప్రశంసలు గుప్పించింది. నటిగా రుక్సార్ కెరీర్ కు ఈ సినిమా చాలా ముఖ్యం. ఈ సినిమా ఫెయిల్ అయితే ఇక ఛాన్స్ లు రావడం కష్టమే. అందుకే “కృష్ణార్జున యుద్ధం” కోసం బాగా కష్టపడుతోంది. మరి నాని ఇచ్చిన సూచనలు ఆమెకు ఏమేర ఉపయోగపడ్డాయో తెలియాలంటే సినిమా రిలీజ్ వరకు ఆగాల్సిందే.
