Balakrishna: అయ్యో.. ఆవిడ కూడా బాలయ్యకు నో చెప్పిందా..?

June 18, 2021 / 07:53 PM IST

టాలీవుడ్ స్టార్ హీరో బాలకృష్ణ సినిమాలలో ఇద్దరు లేదా ముగ్గురు హీరోయిన్లు ఉంటారనే సంగతి తెలిసిందే. బాలయ్య వయస్సు ఎక్కువ కావడంతో యంగ్ హీరోయిన్లు, భారీగా క్రేజ్ ఉన్న హీరోయిన్లు ఆయనతో కలిసి నటించడానికి అంగీకరించడం లేదు. అయితే సీనియర్ హీరోయిన్లు సైతం బాలయ్యకు నో చెప్పినట్టు ప్రచారం జరుగుతుండటం గమనార్హం. బాలయ్య నటించిన చెన్నకేశవరెడ్డి సినిమాలో టబు నటించిన సంగతి తెలిసిందే. బాలయ్య మరో సినిమా పాండు రంగడులో కూడా టబు నటించారు.

అయితే గోపీచంద్ మలినేని డైరెక్షన్ లో బాలయ్య హీరోగా తెరకెక్కుతున్న సినిమాకు మేకర్స్ టబును సంప్రదించగా ఆమె నో చెప్పినట్టు ఇండస్ట్రీ వర్గాల్లో ప్రచారం జరుగుతుంది. అఖండ మూవీ షూటింగ్ పూర్తైన వెంటనే బాలయ్య గోపీచంద్ మలినేని సినిమా షూటింగ్ ను మొదలుపెట్టనున్నారని తెలుస్తోంది. ఇప్పటికే ఈ సినిమాలోని ఒక పాత్ర కోసం విలన్ పాత్రలతో గుర్తింపును సంపదించుకున్న వరలక్ష్మీ శరత్ కుమార్ ఎంపికైన సంగతి తెలిసిందే. మరోవైపు ఈ సినిమాలో మెయిన్ హీరోయిన్ గా ఎవరు నటిస్తారో తెలియాల్సి ఉంది.

మెయిన్ హీరోయిన్ల జాబితాలో శృతి హాసన్ తో పాటు మరి కొందరు హీరోయిన్ల పేర్లు వినిపిస్తున్నా అధికారిక ప్రకటన అయితే రాలేదు. అఖండ సినిమాకు హీరోయిన్ల సమస్య ఎదురు కాగా బోయపాటి శ్రీను చివరకు ప్రేక్షకుల్లో ఏ మాత్రం క్రేజ్ లేని ప్రగ్యా జైస్వాల్, పూర్ణలను ఫైనలైజ్ చేశారు. బాలయ్య గోపీచంద్ మలినేని సినిమాకు థమన్ సంగీతం అందించనుండగా ఈ సినిమాకు సంబంధించి ఇతర వివరాలు తెలియాల్సి ఉంది.