సినీ ప్రియులకు దర్శకుడు బాల గురించి ప్రత్యేకించి పరిచయం చేయాల్సిన పనిలేదు. వైవిధ్యమైన చిత్రాలకు కేరాఫ్ అడ్రస్ గా నిలిచే అతికొద్ది మంది దర్శకులలో ఆయనొకరు. బాల దర్శకుడిగా ఈ ఏడాది ఆరంభంలో తెరమీదికొచ్చిన ‘తార తప్పట్టై’ చిత్రానికి ఆశించిన ఫలితం రాలేదు. తర్వాతి చిత్రంగా ‘కుట్ర పరంపరై’ చిత్రాన్ని చేయాలనుకున్న సీనియర్ దర్శకుడు భారతీరాజా ఆ కథతో సినిమా చేస్తున్నాడటంతో ఆ ప్రయత్నాన్ని విరమించుకున్న బాల తన తర్వాతి చిత్రానికి రంగం సిద్ధం చేశారని కోలీవుడ్ వర్గాల సమాచారం.
ఈ చిత్రంలో శింబు కథానాయకుడిగా నటించనుండటం విశేషం. ఈ మేరకు జరిగిన కథా చర్చలు కూడా సఫలమయ్యాయట. అయితే ఇద్దరి ముక్కుసూటి మనుషులే కావటం మూలాన నిర్మాణ సమయంలో “ఏం జరుగుతోందో?” అని గుసగుసలాడుకుంటున్నారు. ఇదిలా ఉంటే శింబు ప్రస్తుతం ‘త్రిష లేదా నయనతార’ ఫేమ్ ఆధిక్ రవిచంద్రన్ తెరకెక్కిస్తోన్న ‘అన్బానవన్‌ అసరాదవన్‌ అడంగాదవన్‌’ షూటింగ్‌లో శింబు బిజీగా ఉన్నారు. ఇది పూర్తవగానే బాల-శింబు చిత్రం మొదలవనున్నట్టు తెలుస్తోంది.
