నేనెక్కడ అడుగుపెడితే అక్కడ ఫైరే:టిక్ టాక్ స్టార్

May 19, 2022 / 08:02 PM IST

టిక్ టాక్ యాప్ ద్వారా ఎంతోమంది ఎన్నో వీడియోలు చేస్తూ వాటిని సోషల్ మీడియా వేదికగా షేర్ చేస్తూ విపరీతమైన ఫ్యాన్ ఫాలోయింగ్ ఏర్పరుచుకున్నారు. అయితే ప్రస్తుతం ఈ యాప్ మన దేశంలో నిషేధించబడినప్పటికీ ఇతర దేశాలలో టిక్ టాక్ ఎంతో ఆదరణ సంపాదించుకుంది. ఈ టిక్ టాక్ మాయలో పడి ఈ వీడియో వ్యూస్ కోసం ఎంతటి సాహసాలను చేయడానికైనా సిద్ధపడుతున్నారు. ఈ క్రమంలోనే కొందరు మంచి పనులు చేస్తూ రాత్రికి రాత్రే సెలబ్రిటీలు గా మారిపోగా మరికొందరు చేస్తున్న పనుల వల్ల భారీగా నెటిజన్ల నుంచి ట్రోలింగ్స్ ఎదుర్కొంటున్నారు.

ఈ క్రమంలోనే పాకిస్తాన్‌ సోషల్‌ మీడియా స్టార్‌ హ్యుమైరా అస్గర్‌ షేర్‌ చేసిన టిక్ టాక్ వీడియోపై యావత్‌ ప్రపంచం మొత్తం ఆగ్రహం వ్యక్తం చేస్తూ తనని దారుణంగా ట్రోల్ చేస్తున్నారు. ఇలా ప్రపంచం మొత్తం ఆగ్రహం వ్యక్తం చేసే అంత పని తను ఏం చేసిందనే విషయానికి వస్తే…హ్యుమైరా తగలబడుతున్న చెట్ల ముందు ఎంతో అందంగా తయారయ్యి నడుచుకుంటూ వస్తోంది. ఈ క్రమంలోనే ఈ వీడియోని షేర్ చేస్తూ నేనెక్కడ అడుగు పెడితే అక్కడ ఫైరే అనే క్యాప్షన్ జోడించి ఈ వీడియో షేర్ చేశారు.

ఇక ఈ వీడియో షేర్ చేసిన అతి తక్కువ సమయంలోనే సోషల్ మీడియాలో వైరల్ గా మారింది. ఈ క్రమంలోనే కొందరు ఈ వీడియోపై స్పందించి పిచ్చిదానివా? నీ వీడియో కోసం ఏకంగా అడవిని తగలబెడుతున్నావు అంటూ దారుణంగా ట్రోల్ చేస్తున్నారు. దీంతో అలర్ట్ అయిన హ్యుమైరా తాను చెట్లకు ఏవిధంగాను హాని తలపెట్టలేదని చెప్పుకొచ్చారు. ఈమె ఈ విధంగా చెప్పినప్పటికీ ఎంతోమంది పర్యావరణ ప్రేమికులు ఈమె చేసిన పనిని క్షమించ లేకపోయారు.

ఈ క్రమంలోనే పర్యావరణ ప్రేమికులు ఈ వీడియో పై స్పందించి ఒకవేళ నువ్వు పెట్టకపోయినా ఆ మంటలను ఆర్పే ప్రయత్నం చెయ్యొచ్చు కదా? అంటూ తన పై యథావిధిగా ఆగ్రహం వ్యక్తం చేస్తున్నారు. మొత్తానికి ఈమె షేర్ చేసిన ఈ వీడియో క్షణాల్లో వైరల్ గా మారింది. ఇకపోతే హ్యుమైరా అస్గర్‌కు టిక్‌టాక్‌లో ఏకంగా 11 మిలియన్ల మంది ఫాలోవర్లు ఉన్నారు.