కేరళను వర్షం కుదిపేసింది. గత వారం రోజులుగా వరద ముంచెత్తుతోంది. అనేక ప్రాంతాలు నీటమునిగాయి. ఇప్పటివరకు 300 మందికి పైగా ప్రాణాలు కోల్పోగా.. వందలాది మంది నిరాశ్రయులయ్యారు. ఎన్డీఆర్‌ఎఫ్‌ సిబ్బంది సహాయక చర్యలు కొనసాగిస్తున్నారు. భారీ వర్షాలు, వరదల కారణంగా తీవ్రంగా నష్టపోయిన తమ రాష్ట్రాన్ని ఆదుకునేందుకు విరాళాలు అందించాలని కేరళ ముఖ్యమంత్రి పినరయి విజయన్‌ పిలుపునిచ్చిన నేపథ్యంలో దక్షిణాది సినీ ప్రముఖుల స్పందించారు. మాలీవుడ్‌ తో పాటు కోలీవుడ్, టాలీవుడ్ ప్రముఖులు కూడా కేరళ వాసులకు అండగా నిలిచారు. తమకు తోచిన మొత్తాన్ని ముఖ్యమంత్రి సహాయనిధికి విరాళంగా ఇచ్చారు. ఎవరెవరు ఎంతిచ్చారంటే..
టాలీవుడ్
– ‘‘కేరళ ప్రజలు నాపై చూపిన అమితమైన ప్రేమ, అభిమానం.. నా హృదయంలో వారికి ప్రత్యేక స్థానాన్ని ఏర్పరిచింది. వారి కోసం నా వంతుగా సాయం చేయాలి అనుకుంటున్నా’’ అని 25 లక్షలు ఇస్తున్నట్లు హీరో అల్లు అర్జున్‌ ట్వీట్‌ చేశారు.
– రామ్ చరణ్ తేజ్ 25 లక్షలు విరాళంగా అందించారు. పది టన్నుల రైస్ ని కూడా పంపించారు.
– హీరో విజయ్‌ దేవరకొండ కూడా తన వంతుగా సాయం చేసేందుకు ముందుకొచ్చారు. రూ.5 లక్షలు విరాళం ఇచ్చారు.
– ‘గీత గోవిందం’ సినిమా వసూళ్లను కేరళ ముఖ్యమంత్రి సహాయ నిధికి విరాళంగా అందిస్తామని చిత్ర నిర్మాత బన్నీ వాసు తెలిపారు.
– హీరోలు మాత్రమే కాకుండా డైరక్టర్ కొరటాల శివ కూడా మూడు లక్షలు అందజేశారు.
– ఎనర్జిటిక్ హీరో రామ్ ఐదు లక్షల విరాళం అందించారు.
కోలీవుడ్
– తమిళ స్టార్ హీరోలు కమల్‌ హాసన్‌, సూర్య-కార్తి, విజయ్‌ సేతుపతి 25 లక్షలు చొప్పున విరాళం ఇచ్చారు. సూర్య ప్రత్యేకంగా ‘AMMA’ ఫండ్‌కు రూ.10 లక్షలు విరాళంగా అందించారు.
– హీరో సిద్ధార్థ్‌ 10 లక్షలు విరాళం అందిస్తున్నట్లు చెప్పారు.
– హీరో ధనుష్‌ 15 లక్షలు, విశాల్‌, శివకార్తికేయన్‌ రూ.10 లక్షలు చొప్పున కేరళ ముఖ్యమంత్రి సహాయ నిధికి విరాళం ఇచ్చారు. సన్‌ టీవీ నెట్‌వర్క్‌ కోటి రూపాయలు విరాళంగా ప్రకటించింది.
మాలీవుడ్‌
స్టార్ హీరోలు మోహన్‌లాల్, మమ్ముట్టి రూ.25 లక్షలు చొప్పున సాయం చేశారు. అసోసియేషన్‌ ఆఫ్‌ మలయాళం మూవీ ఆర్టిస్ట్స్‌ (AMMA) రెండు విడతల్లో 50 లక్షలు ఇచ్చింది.
కొంతమంది చేసిన సాయాన్ని చెప్పుకుంటుంటే మరికొంతమంది తెలియకుండానే సాయం చేసి రియల్ హీరోస్ అనిపించుకుంటున్నారు. దక్షిణాది చిత్ర పరిశ్రమల నుంచి కేరళ వాసులకు సాయం చేసే వారు రోజు రోజుకి పెరుగుతున్నారు.
