Samantha,Aashritha: నీలో ఉన్న శక్తి నీకు తెలియదు సామ్.. ఆశ్రిత పోస్ట్ వైరల్?

October 31, 2022 / 04:07 PM IST

సౌత్ ఇండస్ట్రీలో హీరోయిన్ గా అడుగుపెట్టి అతి తక్కువ కాలంలోనే స్టార్ హీరోయిన్గా గుర్తింపు పొందిన సమంత గురించి ప్రత్యేకంగా పరిచయం చేయాల్సిన అవసరం లేదు. ఇండస్ట్రీలో అడుగుపెట్టిన తర్వాత వరుస సినిమాలలో స్టార్ హీరోల సరసన నటిస్తూ స్టార్ హీరోయిన్ గా గుర్తింపు పొందిన సమంత ప్రస్తుతం సౌత్ ఇండస్ట్రీలోనే నెంబర్ వన్ హీరోయిన్ గా కొనసాగుతోంది. ఇలా సినిమాలలోనే కాకుండా వెబ్ సిరీస్ లలో కూడా నటిస్తూ డిజిటల్ స్క్రీన్ మీద కూడా తన సత్తా చాటుకుంటుంది. ఇదిలా ఉండగా సమంత తన జీవితంలో ఎదురైన ఎన్నో ఒడిదుడుకులను ఎదుర్కొని ఈరోజు ఈ స్థాయిలో నిలబడింది.

గతంలో ఒకసారి అనారోగ్య సమస్యలతో బాధపడిన సమంత కొంతకాలం సినిమాలకు దూరమైంది. ఆ తర్వాత నాగచైతన్య ని ప్రేమించి పెళ్లి చేసుకున్న సమంత వైవాహిక జీవితంలో వడిదుడుకులు ఎదురై నాగచైతన్యకు దూరం అయింది. నాగచైతన్యతో విడిపోయిన తర్వాత ప్రేక్షకుల నుండి విమర్శలు ఎదురైనా కూడా సమంత ఎంతో ధైర్యంగా నిలబడి ఒంటరిగా తన ప్రయాణాన్ని కొనసాగిస్తూ ఎందరికో ఆదర్శంగా నిలిచింది. నాగచైతన్య నుండి విడిపోయిన తర్వాత వరుస సినిమాలు చేస్తూ బిజీగా ఉంటున్నా సమంత జీవితంలో అనారోగ్యం రూపంలో మరొక సమస్య ఎదురయింది.

గత కొన్ని రోజులుగా సమంత సోషల్ మీడియాకి దూరంగా ఉండటంతో ఆమె మునుపటిలాగే చర్మవ్యాధితో బాధపడుతుందని కొంతకాలంగా వార్తలు వినిపిస్తున్నాయి. తాజాగా సమంత సోషల్ మీడియా ద్వారా తన అనారోగ్యం గురించి తెలియజేస్తూ ఒక పోస్ట్ షేర్ చేసింది. సమంత ప్రస్తుతం మయోసైటిస్ అనే ప్రమాదకర ఆటో ఇమ్యూన్ వ్యాధితో బాధపడుతూ చికిత్స తీసుకుంటుంది. సమంత ఈ వ్యాధి నుండి కోలుకోవటంతో పెద్ద ప్రమాదం తప్పింది. ఇప్పటికీ సమంత డాక్టర్ల పర్యవేక్షణలో చికిత్స తీసుకుంటూ మరి కొన్ని రోజులలో పూర్తిగా ఈ వ్యాధి నుండి కోలుకొంటుంది డాక్టర్లు వెల్లడించినట్లు సమంత సోషల్ మీడియా ద్వారా పోస్ట్ షేర్ చేసింది.

దీంతో పలువురు సెలబ్రిటీలతో పాటు సమంత అభిమానులు కూడా ఆమె తొందరగా కోలుకోవాలని సానుభూతి తెలియజేస్తూ పోస్ట్లు చేస్తున్నారు. ఈ క్రమంలో దగ్గుబాటి వెంకటేష్ కూతురు అశ్రిత కూడా సమంత అనారోగ్యంపై ఇటీవల స్పందించింది. ఇటీవల సమంత షేర్ చేసిన పోస్ట్ కి ఆశ్రిత రిప్లై ఇస్తూ.. నీ గురించి నీకు తెలియదు సమంత.. నీలో ఉన్న శక్తి గురించి నీకు తెలియదు. అనంతమైన ప్రేమ నీకు పంపుతున్నా’ అంటూ సమంత తొందరగా కోలుకోవాలని ఆశిస్తూ ఇంస్టాగ్రామ్ లో కామెంట్ పెట్టింది.