నిహారిక నన్ను నమ్మటం లేదు : వెన్నెల కిషోర్

మెగా బ్రదర్ నాగబాబు కూతురు నిహారిక తనని నమ్మడం లేదని హాస్య నటుడు వెన్నెల కిషోర్ చెప్పారు. ఎందుకు నమ్మడం లేదంటే.. నిజ జీవితలో కాదు సినిమాలో అని స్పష్టం చేసాడు. మెగాస్టార్ కుటుంబం నుంచి తొలి హీరోయిన్ గా కొణిదెల నిహారిక “ఒక మనసు” చిత్రం ద్వారా ఎంట్రీ ఇస్తున్నారు. నాగ శౌర్య హీరోగా నటిస్తున్న ఈ సినిమాలో వెన్నెల కిషోర్ డాక్టర్ నాగేశ్వర రావు పాత్రలో నవ్వించనున్నాడు. “ఈ చిత్రంలో సంధ్య(నిహారిక) తో నా పేరు డాక్టర్ నాగేశ్వర రావు అని, నా పుట్టిన రోజు 8.7.1987 అని చెబితే.. పేరు ఓకే .. డేట్ ఆఫ్ బర్త్ నిజం కాదని చెబుతోంది. ప్రామిస్ కూడా చేసాను. అయినా నమ్మడం లేదు.” అని వెన్నెల కిషోర్ ట్విట్టర్ లో పోస్ట్ చేశారు.

“మల్లెల తీరంలో” ఫేమ్ రామరాజు డైరెక్ట్ చేస్తున్న “ఒక మనసు” సినిమాని టీవీ9 సమర్పణలో మధుర శ్రీధర్ నిర్మించారు. సునీల్ కశ్యప్ అందించిన ఆడియో సైతం ఇటీవలే రిలీజైంది. పాటలు ఆకట్టుకుంటున్నాయి. ఈ చిత్రం జూన్ 24 న విడుదలకు సిద్ధమవుతోంది. మెగా ఫ్యామిలీ నుంచి మొదటిసారి ఓ హీరోయిన్ ఇండస్ట్రీకి లాంచ్ అవుతున్న సినిమా కావడంతో ఒక మనసు మూవీపై భారీ అంచనాలు ఏర్పడ్డాయి.