పెళ్లి చూపులు సినిమాకి ముందు చిన్న చిన్న రోల్స్ లో కనిపించిన విజయ్ దేవర కొండ కి అర్జున్ రెడ్డి మూవీ ఎనలేని క్రేజ్ ని తెచ్చి పెట్టింది. ఈ సినిమా తర్వాత హీరోగా ఏకంగా ఐదు సినిమాలను ఒప్పుకున్నారు. ట్యాక్సీవాలా రిలీజ్ కి సిద్ధమవుతుండగా.. నోటా, డియర్ కామ్రేడ్ సెట్స్ పై ఉన్నాయి. ఇలా హీరోగా ఫుల్ స్వింగ్ లో ఉన్న విజయ్ .. మహానటి సినిమాలో చిన్న రోల్ చేశారు. ఈ సినిమా ప్రమోషన్లో భాగంగా మీడియా ముందుకు వచ్చిన విజయ్ దేవర కొండ ఈ సినిమాలో చిన్న పాత్ర ఒప్పుకోవడానికి కారణం ఏంటో చెప్పారు. “సావిత్రి బయోపిక్ లో అవకాశం రాగానే సావిత్రి పాత్ర అయినా చేస్తాను అని చెప్పాను. దీంతో నిర్మాత స్వప్నదత్ గట్టిగా నవ్వేసి ఒక చిన్న పాత్ర చేయాలనీ చెప్పడంతో వెంటనే ఒప్పేసుకున్నా.
ఎందుకంటే మహానటి టీమ్ తో నాకు దగ్గరి సాన్నిహిత్యం ఉంది. ఎవడే సుబ్రమణ్యం సినిమా వారితో కలిసి చేశాను. దర్శకుడు నాగ్ అశ్విన్ నాపై వ్యక్తిగతంగా ప్రభావం చూపిన వ్యక్తి. దీంతో చిన్న పాత్ర అయినా నో చెప్పలేదు.” అని వివరించారు. ఇక సమంత గురించి మాట్లాడుతూ ” ఈ సినిమాలో సమంతతో కలిసి నటిస్తానని ఊహించలేదు. నటనలో ఆమె సీనియర్ అయినప్పటికీ సెట్ లో ఆ విధంగా ఎప్పుడూ ప్రవర్తించలేదు. సావిత్రి గురించి పరిశోధన చేసే సమంతకు సాయం చేసే పాత్ర నాది” అని విజయ్ తెలిపారు. నేడు రిలీజ్ అయిన మహానటి విశేష స్పందన అందుకుంది. ప్రజలు మహానటి జీవితాన్ని చూసి ఆనందిస్తున్నారు. చిన్న పెద్ద అని తేడా లేకుండా అందరూ ఈ సినిమాని చూసేందుకు ఆసక్తి కనబరుస్తున్నారు.
